O BNG anunciou que vai denunciar ao goberno local da Coruña ante a Xunta Electoral de Zona por convocar a ‘cea do deporte’ o próximo 5 de maio, “apenas uns días antes do comezo da campaña das eleccións municipais”.

Segundo precisa a formación política, o 4 de abril publicouse no Boletín Oficial do Estado (BOE) o decreto de convocatoria das eleccións municipais. A partir dese momento, e segundo a lei electoral vixente, engade, “non se poden producir actos de propaganda institucional”.

Para o portavoz do BNG no Concello herculino, Francisco Jorquera, trátase de “un intento por parte do goberno local de usar recursos públicos, institucionais, para publicitar o labor do propio goberno local, o cal contraviene por completo o establecido na lei electoral vixente”.

O tamén candidato nacionalista á Alcaldía reclama “xogo limpo” na campaña e que “non se usen recursos públicos, recursos de todos os cidadáns, con fins partidistas e electorais”.