A portavoz nacional do BNG, Ana Pontón, reivindicou a figura de Avia Veira como a candidata á Alcaldía da Coruña que abrirá “un novo tempo” na cidade herculina, tras a súa elección para optar á máxima responsabilidade municipal na asemblea que o partido celebrou este mércores. E é que Avia Veira, desde hai anos edil no consistorio coruñés, optará á Alcaldía tras a decisión do anterior candidato e actual portavoz municipal do BNG, Francisco Jorquera, de non presentar á reelección.

Veira será a primeira muller da formación nacionalista candidata á alcaldía da Coruña. “Quero agradecerlle a todas as mulleres do BNG que estiveron en posicións de responsabilidade e implicadas na nosa localidade toda a súa entrega, porque se eu hoxe dou este paso é por todas elas e tamén por todas as coruñesas”, sinalou.

Tras reunirse con ela e, posteriormente, felicitala pola súa elección, a dirixente nacionalista resaltou a “enorme traxectoria” da candidata, da que dixo que “vai ir a por todas”. “É necesario que nesta cidade ábrase un tempo novo para que sexa un referente dentro do país”, manifestou para incidir no obxectivo do BNG de dotar á cidade de “un proxecto de futuro”. Con agradecemento ao actual portavoz municipal do BNG, Francisco Jorquera — cuxa continuidade á fronte deste labor aínda está por decidir — , Pontón avogou por impulsar políticas que xeren “máis cohesión social”.

Á súa vez, Avia Veira comprometeuse a traballar por unha cidade “mellor gobernada”. Ademais, insistiu en que se presenta “con moita ilusión” ao ser a primeira muller candidata do BNG á Alcaldía coruñesa. “Hai veciños con moitos problemas qe esixen respostas reais”, sinalou para referir a cuestións como o servizo de lixo ou a mobilidade. A súa proposta, insistiu, é “pór á Coruña no centro, gobernar pensando na xente”.

“Eu son filla desta cidade. Aquí nacín, aquí me criei, aquí estudei, aquí construín a miña vida e quero que a Coruña teña un futuro mellor. Non veño con promesas baleiras. Veño co traballo feito, co coñecemento da cidade, do Concello e configuraremos un equipo que coñeza os barrios, as necesidades, as esperanzas da nosa xente”, declarou emocionada.