A Xunta, a través da Consellería de Infraestruturas e Mobilidade, abrirá ao tráfico desde este xoves unha das calzadas do viaduto superior da ligazón da Vía Ártabra coa N-V en Iñás, no concello de Oleiros.

De forma paralela ao proceso xudicial, a Xunta reiniciou en xuño do pasado ano as obras destinadas a concluír a ligazón a tres niveles prevista no proxecto de conexión da Vía Ártabra coa AP-9 para finalizar este tramo da conexión coa estrada nacional.

Nas últimas semanas, informa o departamento autonómico, foise avanzando nos traballos de firmes da ligazón da Vía Ártabra coa N-V, “que é a parte da obra que se vai a terminar de executar debido á sentenza tras o contencioso interposto polo Concello de Cambre“.

Estes últimos días, engade, os traballos centráronse nas barreiras e, deste xeito, as actuacións executadas permitirán realizar a última fase de desvíos, o que implica xa a apertura do tránsito por unha das calzadas do viaduto superior, o que dá continuidade á N-V. A previsión é abrir esta conexión ao tráfico a partir das 10,00 horas.