Un total de 47 traballos procedentes de 21 países diferentes concursarán na sección de curtametraxes na primeira edición do do festival internacional de animación ‘Imaxinaria’. Este evento celebrarase do 10 ao 14 de maio, na sede de Afundación na Coruña e xa conta con 1.400 persoas inscritas.

Así o anunciaron, durante a presentación, os seus directores, o ilustrador, debuxante e director coruñés Alberto Vázquez e a comisaria da Mostra Internacional de Ilustración Contemporánea (Miic), Matilde Rodríguez; así como a coordinadora da área de cultura de Afundación, Marité Cores.

Vázquez indicou que o obxectivo deste encontro é “levar a animación a todos os públicos e mostrar as posibilidades técnicas e narrativas que ten este medio” e a súa “diversidade” no mundo. O festival, segundo explicou, ademais do concurso, con cinco premios, inclúe tamén un programa paralelo “composto por diferentes seccións temáticas, composición de longametraxes, charlas e retrospectivas nas que participarán convidados destacados”.

RELATORES

Deles, o director citou, entre outros, a presenza do “padriño” deste evento, o animador Michaël Dudok de Wit, gañador dun Óscar á mellor curtametraxe de animación en 2001 por ‘Pai e filla’, que dará unha clase maxistral sobre o seu traballo. Aludiuse tamén á participación de Isabel Helguera, quen recibirá o premio ‘Activismo en animación’ e dará unha master class sobre a súa próxima película, ‘O soño da sultana’.

Matilde Rodríguez, pola súa banda, fixo fincapé en que o “fin” deste encontro é “achegar a animación menos comercial a todos os públicos, educar ás novas xeracións e crear novos públicos fomentando a curiosidade”.