O presidente da Cámara de Comercio da Coruña, Antonio Couceiro, sinalou que este ano será un exercicio de “crecemento positivo, cun PIB da área contorna ao 2%”, o cal implica que a maioría das empresas “van manter o seu emprego e mesmo ao redor dun 20% teñen perspectivas de crecemento dese emprego“.

Fíxoo na presentación do balance do organismo cameral correspondente a 2022 e nun acto xunto ao director xeral da Cámara de Comercio, Manuel Galdo. No entanto, o presidente explicou que seguen existindo “nuboeiros permanentes” pola inflación. “Parece que empeza a conterse pero seguimos tendo unha inflación subxacente superior ao 5%, máis do dobre do que as autoridades comunitarias pretenden como estabilización que é en torno ao 2%”, puntualizou. “Hai que seguir traballando para que non se produza unha nova espiral inflacionista”.

En relación a 2022, Galdo sinalou que o resultado final do exercicio do organismo cameral é positivo sen ningún tipo de débeda financeira nin comercial. Neste contexto, dixo que a Cámara prestou “máis formación, máis empredimento, máis comercio exterior, máis innovación, máis dixitalización e máis servizos”. En canto á actividade desenvolvida transferiron a empresas e particulares “máis de 3,3 millóns de euros” e atenderon “a 4.500 empresas e a 1.900 particulares”.

Para os programas de fomento de emprego dirixidos a mozos e persoas maiores de 45 anos en situación de desemprego, xestionou 1,5 millóns de euros e para os programas de internacionalización, a Cámara manexou un orzamento de 1,2 millóns. Para innovación e novas tecnoloxías, destinou case 622.000 euros e a emprendimiento un orzamento de preto de 1,7 millóns.