O Xulgado do Mercantil número 1 da Coruña admitiu a trámite a demanda colectiva presentada pola Asociación Galega de Consumidores e Usuarios (Acouga) que reclama a doce entidades financeiras a devolución de comisións cobradas de forma “indebida” aos seus clientes pola apertura de créditos hipotecarios e os intereses xerados desde a súa firma.

A querela está dirixida contra Abanca, Banco Sabadell, Banco Santander, Bankia, Bankinter, BBVA, Caixabanc, Ibercaja Banco, Kutxabank, Novo Banco, Unicaja Banco e Caixa Rural Galega, segundo explicou Acouga nun comunicado remitido aos medios este mércores no que anima ás persoas posiblemente afectadas a sumarse á denuncia.

A asociación demandante pide a devolución da contía que a entidade prestamista introduce como cláusula de apertura na escritura da hipoteca “só polo feito” da súa concesión e que oscila entre o 0,5% e o 1% do total, o que en termos absolutos varía entre os 750 e os 1.200 para cada consumidor.

“A comisión de apertura non obedece a gasto ou servizo ningún que o consumidor teña que retribuírle ao banco pola xestión da hipoteca“, sinalou o secretario xeral de Acouga, Xoán Antón Pérez-Lema, que entende que a reclamación vai na liña coa doutrina fixada polo Tribunal de Xustiza da UE en 2020 que determina que esta comisión “non é unha condición esencial do préstamo”.

Acouga estima que podería haber uns 4 millóns de clientes bancarios afectados polo cobro destas comisións, polo que considera que a demanda será “unha das máis importantes de España e a maior de Galicia” en defensa dos dereitos dos consumidores.

A asociación sinalou que poden sumarse reclamantes de toda España a pesar de estar presentada ante un xulgado coruñés. Ademais, considera que a sentenza do TJUE de marzo de 2023 que outorga aos xuíces de cada país a controlar a transparencia destas cláusulas determina que existe un desequilibrio entre as partes “cando o banco non demostra que a comisión de apertura responde a servizos efectivamente prestados e a gastos nos que incorrese”.