Dúas lendas de Cambre unidas pola música. O grupo local Inadaptados marcou o ritmo ao recente ascenso do Sporting Cambre coa creación dun himno para o club, un clásico do fútbol no municipio.
Este é o último traballo presentado polos Inadaptados e foi realizado “con todo o cariño”, segundo recoñece o propio grupo. O Sporting Cambre celebra este ano o seu 90 aniversario, algo que “motivou e animou” á banda a crear tanto a letra como a música da canción. O Sporting fíxose eco do himno, destacando que o tema xurdiu da “vinculación dos Inadaptados co noso club”.
Guillermo Sabaris, Carlos Figueira, Luis Valencia (membro da xunta directiva do Sporting), Lucía Louro Pallares (profesora da Escola de Música Sementeira), Alba Rodríguez Quintela (alumna da Escola de Música Sementeira e xogadora do equipo feminino do Sporting Cambre) e Veiga González Romero (do equipo Sporting Biberón).
A estrea do himno coincidiu coa última vitoria acadada polo club: o Modesto A do Sporting Cambre ascendeu a 1º Galicia tras gañar o partido ante o Carnoedo C.F.
O 3 de xuño, coincidindo co Día da Xente Nova de Cambre, a banda interpretará en directo o novo himno do club deportivo.
