Os Bombeiros tiveron que intervir esta noite de novo na nave abandonada que a semana pasada ardeu en Oleiros, onde se reactivaron as chamas.

En concreto, segundo a información do CIAE 112-Galicia, o lume reactivouse en varios focos preto da medianoite e obrigou aos Bombeiros a actuar ata as 2 da madrugada.

A nave, situada en Curros Enríquez, está sen actividade e no seu interior aínda se acumula lixo, madeira e coches abandonados. Nesta ocasión, o lume afectou o interior.

No operativo participaron axentes de Policía Local, membros do GES de Oleiros e os Bombeiros de Arteixo. A pesar de que o lume quedou apagado ao redor das 2 da madrugada, outro particular contactaba co 112 á primeira hora deste venres para informar de que vía saír fume da nave.

Nestes momentos, os membros do Servizo de Emerxencias atópanse no punto arrefriando a zona, sen que fose necesaria a intervención dos Bombeiros.