O delegado do Goberno en Galicia, José Ramón Gómez Besteiro, incidiu en que as obras de dragado da ría do Burgo están a executarse “dentro dos prazos previstos”, expuxo nunha visita á zona para comprobar o seu desenvolvemento e despois de que se fixase 2024 para a finalización dos traballos.

Sobre a súa visita á zona, dixo que o obxectivo, tras a súa toma de posesión como delegado do Goberno en Galicia, foi coñecer o desenvolvemento destes traballos aos que aínda lles quedan “meses de execución”.

Besteiro destacou a “espectacularidade” das actuacións en marcha nun proxecto “de dimensións ambientais único en España”. Mentres, preguntado cando será posible volver retomar a actividade marisqueira, remitiuse aos prazos xa comprometidos, nunha visita con presenza, entre outros, da subdelegada do Goberno na Coruña, María Rivas, e do alcalde en funcións de Culleredo, José Ramón Rioboo.