A Xunta aprobou o proxecto de demolición do actual Hotel de Pacientes do Complexo Hospitalario Universitario da Coruña (CHUAC), que se licitará nas próximas semanas e suporá un investimento de 1,4 millóns de euros.

Segundo explican nun comunicado, o proxecto, cun prazo de ejecucuión de sete meses, foi realizado pola UTE Pinarq-VázquezMuiño-Monteoliva, e contempla a demolición do actual edificio que conta con 7.691 m2 construídos divididos en 10 plantas, oito delas sobre rasante e dous baixo rasante.

Esta intervención, destacan, é necesaria para habilitar o espazo preciso para a execución do novo anel perimetral do sistema viario que bordeará o novo CHUAC.

As obras realizaranse tendo en conta as vías de acceso e están planificadas para non interromper o funcionamento do complexo e minimizar a xeración de po e ruído.

A demolición levará a cabo “da forma máis eficiente e sustentable, optando por un criterio de demolición elemento a elemento”. Así, os traballos seguirán a orde inversa que corresponde a unha obra nova, procedendo desde arriba a abaixo e procurando que a demolición se realice ao mesmo nivel.

O derrube executarase en dúas etapas, derrubando na primeira o volume correspondente ao salón de actos e unha parte do bloque administrativo, composta de tres plantas, para dispor dunha zona máis ampla para a manobra da maquinaria e a realización dos traballos.

Xa na segunda fase acometerase o derrube do resto dos bloques, o chamado bloque alongado, e o resto das dependencias administrativas.

Para a execución de cada unha das etapas seguirase un plan de cinco fases, empezando pola de desamiantado. Unha segunda fase corresponderá á demolición interior para minimizar as afeccións, xa que se realizará conservando todo o cerramento exterior da fachada.

A terceira fase será a demolición exterior, á que lle seguirá a estrutura, e a última consistirá na formación dunha plataforma realizada con produtos procedentes da demolición e posterior acabado mediante pavimento asfáltico, realizando un estendido de terra vexetal sobre os noiros para adecuar a área afectada polos traballos.