Hoxe venres péchase o prazo de inscrición para os talleres e charla do mercado LAMA ZETA que se celebrará o sábado, 8 de novembro, en Expocoruña. Se ben a entrada é libre, os interesados en asistir á charla ou talleres deberán apuntarse a través de www.lamazeta.es.
A do sábado será unha completa xornada pet friendly, con máis de 40 proxectos, charlas, obradoiros, galería e sesión vermú. Unha xornada para os amantes das plantas e da cerámica, que abrirá ás 10:00h e terá 9 horas chegas con 40 actividades entre casetas, charla e talleres nos que se mostrará desde cerámica e viveiros ata florerías, artistas e marcas sostibles.
LAMA ZETA é a proposta de Sísmica, baixo a dirección de Thais Suárez co que se recupera o espírito do Mercado das flores de María Pita, e conta con a colaboración de Ampega, Cerámica Campo, Enea, Lenzo studio, Kibutz, Daveiga, Os biosbardos, Terras de Buño e Usual.
View this post on Instagram
Talleres
Pola mañá os talleres comezarán con Apañando Herbas onde se poderá aprender a arte da destilación tradicional de herbas. Doutra banda Cristina Velasco ensinará aos asistentes como transformar o papel en flores.
Na xornada matinal tamén se realizará a cabo o taller de impresión vexetal Hapa Zome a cargo de Meniña Plants Flow con estampaxe botánica sobre tea.
Pola súa banda Susana Anta será a responsable do taller de xoiería co que descubrir como crear xoias únicas inspiradas na natureza, unha cita na que cada participante poderá elaborar ata tres pezas: colgantes, pendente ou aneis.
Pola tarde será a quenda de Flores Farándula que ensinará a deseñar e crear centros de mesa adaptándoos a cada época do ano e Axóuxeres con Luís do Río no que coñecer e realizar un instrumento musical con elemento naturais como xuncos, canas e pedras.
Entre a oferta inclúese un taller de plantas en miniatura a cargo de Nacuminis. Antonia Studio será a responsable da cita na que se poderá descubrir como transformar residuos plásticos en pezas decorativas únicas e sostibles; e o de Kokedamas de Espora Coruña, onde poderás aprender a crear estas esferas vexetais xaponesas e a conectar coa natureza a través das mans.
Charlas
A primeira charla da xornada será ás 11 horas con Os Biosbardos e Kibutz Cooperativa Galega que presentarán Falando de Horta na que presentarán o seu proxecto cooperativo mostrando como a horticultura é un espazo colaborativo que permite reconectar coa esencia rural aínda que se viva na cidade.
Ás 12 Nuska Chousa collerá a testemuña e presentará Hortelar en calquera lugar, unha charla na que aprender a plantar en calquera espazo, xa sexa unha terraza ou unha xanela. Dúas horas e media de transmisión de coñecemento que axudasen aos asistentes para sacar máis partido ás novas formas de plantación.
