O festival de música pop e indie Recorda Fest celebrarase na Coruña, no peirao de Batería, os días 8 e 9 de setembro. Nun principio, estaba previsto que este evento tivese lugar no municipio coruñés de Culleredo pero cambiou de localización debido “ao incremento na previsión de venda de entradas“, segundo comunicou a organización.

O cartel do festival confórmano Taburete, Iván Ferreiro, Miss Caffeína, Dorian, Marlon, Mägo de Oz, Pignoise, David Otero, Despistados, Furious Monkey House, DJ Nano, Michenlo e un artista “sorpresa” que se anunciará a mediados do mes de xullo.

O evento inclúe tamén aos DJ’s Adrián Gold, Bea Fernandez, Carlos Barral, Chimeno, David Ribeiro, Joao Ribeiro, Jorge Álvarez, Mark Deluxe, Toni Seijas, Tuxiro e Víctor Rivas.

A programación musical do Recorda Fest, engaden os organizadores, vai dirixida a “toda a familia” e en especial a un público de “entre 25 e 55 anos“. Os nenos menores de 8 anos teñen o acceso gratuíto aos concertos, recalcan. As entradas adquiridas son válidas para o novo festival, “sen necesidade de cambio”.