O director xeral da Cámara de Comercio da Coruña, Manuel Galdo, e o director do Instituto Tecnolóxico de Galicia (ITG), Carlos Calvo, asinaron este mércores un convenio de colaboración para o impulso de comunidades enerxéticas locais na área.

Segundo informaron, as comunidades enerxéticas locais son unha resposta eficiente e sustentable aos desafíos enerxéticos da actualidade. Desta forma, explicaron que con esta colaboración poderán facilitar ás empresas información, apoio na procura de financiamento e proxectos chave en man.

O obxectivo principal é promover a produción, distribución e consumo de enerxía renovable a nivel comunitario, mediante a autosuficiencia enerxética, a eficiencia e a redución de emisións.

Ambas as institucións traballarán para “expandir esta solución” que permitirá, por exemplo, que nun polígono industrial os propietarios das empresas existentes poidan decidir cando e como abastecer, consumir, almacear e distribuír a enerxía renovable que eles mesmos xeren.