A campaña electoral de Sumar Galicia arrincou cun gran encontro na Coruña protagonizado pola súa candidata á Presidencia do Goberno, Yolanda Díaz, e continúa nestes primeiros compases con actos sectoriais, de escoita e de proximidade, o que levou á súa número un por Pontevedra, Verónica Martínez Barbeiro, a Vigo este sábado para reunirse coas traballadoras do servizo de axuda no fogar (SAF).
Xunto a elas, a inspectora de Traballo e ex directora xeral de Traballo do Ministerio que dirixe Yolanda Díaz comprometeu que o labor dun goberno de Sumar pasará por mellorar as condicións laborais deste sector, para “coidar de quen nos coida”, á vez que comprometeu un investimento en Galicia de 6.000 millóns de euros, dos cales mil deles serán en dependencia para o período 2023-2024.
Acompañada pola número dous, Verónica Hermida, e tamén pola candidata ao Senado Gloria Alonso, Barbeiro reivindicou a mensaxe de Yolanda Díaz de que “esta campaña vai das cousas pequenas”, da “vida da xente”. “Queremos escoitalas e coñecer as súas condicións de traballo”, dixo, no referente ás traballadoras do SAF.
Verónica M. Barbeiro lembrou que nestes anos de lexislatura xa tiveron ocasión de reunirse con elas e coñecen algunhas das súas dificultades, pero que queren seguir “escoitando” as súas demandas, como as “dificultades que teñen para ter unha protección de riscos laborais, a carga excesiva de traballo e a infra declaración das súas enfermidades profesionais”.
Así, manifestou o “plan” que ten Sumar Galicia para este sector, un programa cuatrienal do sistema de consolidación de dependencia en Galicia, que xa “se iniciou” esta lexislatura cun investimento medido de mil millóns de euros ao ano. “Agora imos a por máis”, salientou Verónica Martínez Barbeiro, quen se propuxo reducir as listas de espera e mellorar a calidade de atención de vida dos dependentes.
Ademais, como xa manifestara este venres con motivo do conflito do metal e ante a proposta de suspensión de folga por parte dos sindicatos, Barbeiro, que foi a presidenta do Consello de Relacións Laborais de Galicia, volveuse a pór a disposición como “mediadora” para axudar “na solución”.
ACTO CON VOLUNTARIOS
Paralelamente, a cabeza de lista de Sumar Galicia pola Coruña, a doutora en Ciencia Política Marta Lois, aproveitou este sábado para reunirse con voluntarios do proxecto político que sustenta a Yolanda Díaz para a Presidencia do Goberno. “O voto decisivo é o voto a Sumar”, reivindicou Marta Lois, quen dixo que é o que “garante as políticas transformadoras para mellorar a vida da xente”.
E é que a campaña de Sumar pretende falar de ti a ti á cidadanía, apela ao “cambio de tendencia” co vento de cola ao que Yolanda Díaz apelou ao acollerse e “soprar” para lograr a remontada. Así Sumar Galicia continúa con actos de rúa e sectoriais e prevese que continúe con este tipo encontros, aínda que tamén se espera que Yolanda Díaz volva a Galicia para protagonizar outro gran acto.
