O persoal do Centro de Menores Concepción Arenal e o CIEMA, ambos os titularidade da Xunta e xestionados pola Fundación Camiña Social, reclamaron a recuperación do poder adquisitivo dos salarios, a defensa do convenio colectivo propio e unha mellora do servizo que se presta aos menores e denunciaron que a institución non ten “vontade de negociar” e o Goberno autonómico “ponse de perfil” ante o caso.

“Basicamente pedimos unha actualización de salario porque a perda de poder adquisitivo foi brutal, levamos nove anos completamente conxelados”, denunciou o delegado de persoal da Fundación Camiña Social, Marcos García, en declaracións a Europa Press. “Tentámolo absolutamente todo e o único que temos é a calada por resposta”, apuntou.

Foi no marco dunha xornada de folga e dúas concentracións convocadas polas organizacións sindicais CIG-Ensino, UXT-Servizos e CCOO-Ensino. A primeira protesta foi ante a Concepción Arenal e a segunda diante do Edificio Administrativo da Xunta, facéndose o desprazamento dun lugar a outro a modo de caravana reivindicativa de coches.

A folga, segundo especificou García, contou con “un seguimento de máis do 90% e non ten máis polos servizos mínimos que temos que é un servizo moi delicado”.

Segundo o delegado de persoal, a Fundación Camiña Social, a pesar de ter un superávit millonario nas súas contas, de máis de seis millóns de euros, mantén conxelados os salarios dos seus traballadores e traballadoras desde o ano 2014 e alega que “se cingue ao convenio do sector, escusándose nuns supostos balances económicos negativos dos últimos anos, que nada teñen que ver coa realidade da fundación”.

“Esquecéronse completamente de nós”, lamentou, tras engadir que “ao longo destes anos” a Xunta aumentou en varias ocasións a partida orzamentaria á Fundación “e iso non se viu reflectido no aumento dos salarios que son a principal partida do orzamento”. “Non se pon en valor o noso traballo senón todo o contrario e non hai ningunha vontade de chegar a ningún tipo de acordo, están pechados en banda”, insistiu.

En canto á postura da Xunta, García pediu que se “pronuncie” como “responsable último do servizo”. O colectivo tivo “varias reunións” coa Consellería de Política Social, sinalou, e “un pouquiño lávanse as mans dicindo que isto é un conflito laboral”. “É unha posición relativamente cómoda da Xunta cando eles son os que pon o diñeiro”, argumentou.

POLÍTICA SOCIAL

Neste sentido, fontes de Política Social indicaron que este é un conflito “entre a entidade e os traballadores” e instaron “a ambas as partes a que cheguen a un acordo”. “A Consellería non ten competencias para realizar intermediación”, puntualizaron, tras engadir que “non son traballadores da Xunta, senón dunha entidade social que xestiona dous centros” de titularidade autonómica.

Ao mesmo tempo, aclararon que se trata “de centros de reeducación, de cumprimento de medidas xudiciais” e, por tanto, “non son mozos do sistema de protección” da Xunta.

En consecuencia, “despois de dous anos e pico negociando” os traballadores víronse “abocados a entrar en conflito”. “Esta folga é o pistoletazo de saída despois das negociacións erradas e é o comezo dunha serie de mobilizacións que iremos facendo paulatinamente esperando que nalgún momento a Fundación recapacite e dea marcha atrás nesta formulación de cero negociación, cero escoita aos traballadores”, avanzou Marcos García.