InicioA CORUÑAPresentadas 15 propostas para a redacción do Máster Plan de Coruña Marítima

Presentadas 15 propostas para a redacción do Máster Plan de Coruña Marítima

Publicada o

Por Ubaldo Cerqueiro

A licitación pública para a redacción do Máster Plan de Coruña Marítima concluíu a súa fase de presentación de candidaturas, cun total de 15 propostas recibidas. O proceso, despois dos cambios engadidos trala resolución do Tribunal Administrativo Central de Recursos Contractuais, por mor dos recursos que presentaran varios arquitectos, busca seleccionar o equipo responsable de deseñar o futuro do porto interior e a súa integración coa cidade. Con todo, entre o colectivo de arquitectos da zona, non consta a presentación de propostas saídas de estudios da cidade.

Nos próximos días reunirase a Mesa de Contratación, que procederá á apertura da documentación xeral presentada e á identificación das empresas e unións temporais de empresas (UTEs) participantes.

Selección de finalistas

A partir dese momento, abrirase un prazo de 2 meses durante o que se procederá a seleccionar os cinco finalistas, segundo os criterios que figuran no prego. As bases da licitación manteñen a necesidade de que os equipos sexan multidisciplinares, con experiencia acreditada en áreas como urbanismo, paisaxismo, arquitectura, hidroloxía, portos, ferrocarrís e mobilidade, entre outras, dada a complexidade do ámbito de actuación, ao redor dun millón de metros cadrados.

A selección valorará especialmente a calidade e complexidade dos traballos previos, así como a traxectoria profesional, experiencia e recoñecementos obtidos polos equipos. Priorizarase a excelencia técnica fronte ao volume de proxectos realizados.

Avaliación final e adxudicación

Unha vez seleccionados os cinco equipos finalistas, abrirase un período de 5 meses para que estes preparen as súas propostas. Cada unha das cinco ofertas será valorada con criterios que terán en conta a calidade técnica da proposta, a súa funcionalidade, os aspectos ambientais e os aspectos económicos. Desta avaliación sairá a adxudicataria do Máster Plan e nese momento xa se coñecerá a maqueta de todo o proxecto.

O equipo gañador terá entón un ano para desenvolver o plan director do proxecto Coruña Marítima, así como todos os anexos e documentos complementarios que figuran nas bases. O importe da licitación é de 3 millóns de euros, que serán financiados polas seis administracións que impulsan o proxecto: Concello da Coruña, Autoridade Portuaria, Xunta de Galicia, Ministerio de Transportes y Movilidad Sostenible, Puertos del Estado e ADIF.

Un proxecto estratéxico para a cidade

O ámbito de actuación abarca desde o dique de abrigo ata a dársena de Oza, incluíndo a estación de mercadorías de San Diego.

O Máster Plan deberá cumprir cos catorce Acordos Estratéxicos aprobados pola Comisión Coruña Marítima. Entre os seus obxectivos destacan:

– Reforzar a actividade portuaria
– Impulsar novas actividades económicas
– Mellorar a mobilidade urbana e metropolitana
– Crear novos equipamentos públicos, incluído un edificio emblemático que caracterice a intervención
– Potenciar as zonas verdes e a sustentabilidade

 

Máis novas do proxecto

A presidenta do COAG desmonta o proceso da Fachada Marítima: “O que vexo é que a Autoridade Portuaria quere sacar rendemento económico”

Debe condicionar o pago da débeda do porto exterior a trascendental reordenación da fachada marítima?

ÚLTIMAS

(VÍDEO): Desaloxan varios colexios da Coruña tras recibiren sendas falsas ameazas de bomba

Mañá axitada en varios colexios da cidade. Os CEIP Zalaeta, CEIP Raquel Caamacho, o...

Máis dun centenar de obras preséntanse aos Premios Mestre Mateo, con entrega de galardóns en febreiro

Un total de 155 obras presentaron candidatura aos XXV Premios Mestre Mateo, cuxa gala...

A Coruña aposta por un Nadal “sustentable e responsable” nunha nova edición da Casa dos Xoguetes

O Concello da Coruña, a través da Oficina Municipal de Información ao Consumidor (OMIC),...

O coruñés Daniel Agra regresa ao India Photo Fest con catro fotografías

O artista galego Daniel Agra presenta catro fotografías da súa serie Tesseract Daydreams no...

DEIXAR UN COMENTARIO

Please enter your comment!
Please enter your name here