O Ministerio de Transportes, Mobilidade e Axenda Urbana (Mitma) licitou o contrato de obras de rehabilitación do mareógrafo da Coruña, un dos primeiros de España, por un orzamento basee de licitación de máis de 400.000 euros (IVE incluído).

O prazo de presentación de ofertas desta licitación, que xa se publicou na Plataforma de Contratación do Estado, finalizará o próximo día 17 de agosto de 2023. Este mareógrafo, integrado na rede global do Servizo Permanente do Nivel Medio do Mar (PSMSL), é unha infraestrutura para monitorar o nivel do mar que forma parte da rede de mareógrafos do Instituto Xeográfico Nacional (IGN) e facilita datos a investigadores nos campos da geodesia, oceanografía ou cambio climático.

O edificio, que se atopa protexido polo seu alto valor patrimonial, está situado no peirao de Calvo Sotelo do porto da Coruña, está adscrito ao IGN e conta no seu interior cun dispositivo de medición de mareas e unha estación geodésica GNSS que forman parte do equipamento xeográfico de referencia nacional e están integradas en distintas redes nacionais e internacionais dedicadas ao control de procesos dinámicos costeiros, de cambio climático, aplicacións geodésicas e ambientais.

As tarefas científicas e técnicas que se desenvolven nestas instalacións viñéronse realizando ininterrompidamente desde 1948, ano da súa posta en funcionamento. O edificio forma parte dos primeiros mareógrafos construídos en España, xunto co de Alacante e actualmente atópase protexido polo seu valor patrimonial. Durante os últimos anos detectáronse unha serie de patoloxías e danos estruturais que fan necesaria a rehabilitación do edificio.