A familia do coruñés Diego Bello, morto por disparos da policía na illa de Siargao, en Filipinas, o 8 de xaneiro de 2020, mostrou a súa “profunda preocupación” ante a vista que terá lugar o luns 7 de agosto, “na que os tres axentes acusados pola Fiscalía filipina do asasinato de Diego poderían quedar en liberdade baixo fianza“.

Así o asegura nun comunicado no que explica que “os avogados da defensa dos policías Vicente Panuelos, Roel Azarcón e Nido Boy Cortez coñecerán este luns se a súa petición de posta en liberdade baixo fianza é admitida polo Xulgado de Dapa, encargado do caso”. A familia de Diego teme que, de outorgarse esta liberdade, “o proceso poida dilatarse no tempo ou mesmo que xamais chegue a celebrarse”.

Tamén apuntan que, segundo dispón a Lei Penal filipina, calquera acusado dun delito de asasinato debe permanecer en prisión ata que se dite a sentenza correspondente, sen a posibilidade de que estes poidan quedar en liberdade baixo fianza, pero alertan de que poidan saír de prisión “sen que aínda se coñeza a data e localización final do xuízo”.

Por todo iso, a familia de Diego Bello e a Plataforma Xustiza para Diego esixen ao Goberno e ás autoridades xudiciais de Filipinas “o estrito cumprimento da lei e o esclarecemento do asasinato de Diego mediante a celebración dun xuízo con absolutas garantías”. Da mesma maneira, piden ao Goberno español e ás autoridades da Unión Europea “a estreita vixilancia para que estas xustas reivindicacións se leven a cabo”.