O Concello da Coruña aprobou, en Xunta de Goberno local, a adxudicación definitiva do contrato de conservación, mantemento e mellora dos parques e xardíns da cidade herculina cun investimento anual de 7,5 millóns de euros. O prazo de duración do servizo, dividido en cinco lotes, será de tres anos, prorrogables anualmente por dous máis, segundo informa o consistorio.
Noutra orde de cousas, o goberno local informou tamén de que impulsará a inserción laboral coa adxudicación dun lote específico reservado a centros especiais de emprego ou empresas de inserción, promovendo a contratación de persoas con discapacidade ou en risco de exclusión social.
Ademais, o consistorio fixou os festivos locais do ano 2024; serán o 13 de febreiro, martes de Entroido, e o 24 de xuño, festividade de San Xoán.
