O lume rexistrado o mércores pola tarde en Arteixo e que calcinou 20 hectáreas, segue controlado, segundo informou a Consellería do Medio Rural.
Mentres, o edil de Seguridade Cidadá, José María Sánchez Novo, confirmou a existencia a pasada noite de “pequenos focos” que non revestiron ningunha gravidade. Sobre os mesmos, dixo que foron no “medio do monte”, afastados das casas, aínda que admitiu o “nerviosismo” dos veciños, que considerou normal.
Por outra banda, destacou o labor de todos os efectivos na zona e, en particular, dos bombeiros de Arteixo, que lembrou están en folga, pero que actuaron en varias ocasións. Nalgún caso, sobre os “pequenos focos”, indicou que non se chega a actuar, “deixándoos morrer” por si sós.
Sobre as causas deste segundo incendio, asegurou que “parece que foi un brote do do sábado”, día no que, ao mediodía, lanzáronse fogos artificiais, motivo polo que se investiga se a causa estivo niso e se provocou a reactivación do lume, orixinando o incendio do mércores.
Este último comezou ás 17.07 horas do mércores e deuse por controlado o xoves, ao redor das 12.13 horas. Por precaución e debido ao intenso fume aconsellouse o desaloxo de dúas familias de Monticaño que xa se atopaban nas súas casas o xoves.
