Unha exposición exhibe na Coruña, na zona da Autoridade Portuaria, a traxectoria do porto desde a súa orixe, na época dos fenicios, ata a actualidade, coa construción do porto exterior, en Punta Langosteira. A mostra, da que é comisario o xornalista e xestor cultural Rubén Ventureira, contou, no acto de inauguración, coa presenza, entre outros, do conselleiro do Mar, Alfonso Villares.
Tamén estiveron presentes o portavoz do goberno local coruñés, José Manuel Lage, e o presidente da Autoridade Portuaria, Martín Fernández Prado. No acto, o titular do Mar destacou o labor do organismo portuario para achegar os peiraos á cidadanía e enxalzou a dimensión internacional do porto coruñés.
