Persoal do centro de telemarketing Atento protagonizou este venres unha protesta ante a sede na Coruña en rexeitamento aos despedimentos e, en concreto, o cinco últimos en agosto.

“Está a haber un goteo de despedimentos en todos os centros da empresa”, asegurou Natalia López, representante de UGT no comité de empresa de Atento Telecomunicacións.

Ademais, vinculou esta situación co feito de que se declarase hai uns anos nulo o expediente de regulación de emprego (ERE) para 700 persoas a nivel estatal.

“Compénsalles máis o goteo para non chamar a atención”, explicou con motivo desta mobilización e unha xornada de paro de 24 horas en contra dos despedimentos nun centro de traballo que atende servizos de Telefónica, Movistar e Orange.

Sobre a postura da empresa, engadiu que “dá a calada por resposta” e que o argumento para os despedimentos é “baixo rendemento” do persoal afectado. “Nos actos de conciliación, están a recoñecer as improcedencias”, apostilou.