A Consellería de Vivenda e Planificación de Infraestruturas amosou a súa disposición a entregar ao Concello da Coruña os fondos estatais para a cidade como mercado tensionado, algo máis de sete millóns de euros, sempre que se destinen a construír novas vivendas. Nunha carta dirixida ao concello, concreta un prazo de cinco días hábiles para asumir esta proposta fronte á postura municipal de destinar, sobre todo, as axudas á rehabilitación de vivendas para alugueiro social.
No relativo ás comunicacións entre a Xunta e o concello, e nun escrito remitido á directora de Urbanismo do Concello da Coruña, a Consellería nega que pola súa banda se puxese de manifesto que a administración municipal “no estaría colaborando coa Xunta na posta á disposición de solo público para vivenda”.
Neste sentido, a Administración galega agradece a colaboración coa cesión de parcelas nos Rosales, a Praza Porticada e Pedro Fernández para a construción de vivenda pública. Ao respecto, sinala que unha parcela xa está en execución, outra licitada e as dúas restantes “á espera de datos que nos ten que achegar o concello”.
Así mesmo, rexeita que o número de vivendas sexa “descoñecido”, en resposta, afirma, a un escrito municipal, e defende “a axilidade” na tramitación das actuacións que debe levar a cabo a Xunta. “Nun ano escaso desde a escritura de cesión, xa hai 100 vivendas en marcha, moi por diante do prazo máximo estimado de tres anos fixado no acordo de cesión para iniciar as obras”.
MERCADO TENSIONADO
Ademais, sinala que, en atención ás medidas incluídas polo concello no plan da zona de mercado residencial tensionado, solicitou a cesión de novas parcelas para vivendas de promoción pública, xa que, engade, pretende destinar os fondos que lle transfira o Estado “á promoción de vivenda pública de nova construción”.
“Non obstante, se o Concello está en disposición de promover directamente vivendas de promoción pública de nova construción, non hai inconveniente en transferir os 7,2 millóns — dos fondos estatais — para que se destinen exclusivamente a promoción pública de nova construción”.
Ante o envío da proposta ao Ministerio de Vivenda da actuación seleccionada e da administración responsable de executar os fondos, sinala que “de non recibir a conformidade do concello para ceder ao Instituto Galego de Vivenda (IGVS) novas parcelas nin para realizar a promoción directamente por parte do concello, nun prazo máximo de cinco días hábiles, o IGVS destinará os fondos á actuación que pretende desenvolver en solo da súa titularidade” no campus de Elviña para aloxamentos destinados a menores de 36 anos, ademais de residencia xuvenil.
