O Equipo Territorial de Policía Xudicial da Garda Civil de Cambre detivo a dous homes, veciños dos concellos coruñeses de Arteixo e Oleiros, como presuntos autores dun delito de roubo con violencia e intimidación, na fase de explotación da operación Godemon. Segundo explican nun comunicado, a mencionada operación iniciouse por mor dun roubo con violencia e intimidación ocorrido o día 31 de xullo do ano pasado no interior dunha vivenda da localidade de Sada.

O mesmo produciuse á chegada dos moradores ao domicilio, que foron asaltados por dous individuos coa cabeza e o rostro tapado con pasamontañas. Tras ameazar aos habitantes da vivenda cunha arma branca e unha pistola eléctrica, maniatáronos e amordazáronos, golpeando reiteradamente ao home para que lles entregase o diñeiro que gardaba na vivenda.

Como froito do traballo de campo realizado, a Garda Civil identificou a dous homes, “ambos coñecidos das forzas de seguridade por ilícitos de diversa índole”. Así, procederon á detención destas persoas como presuntos autores dun delito de roubo con violencia e intimidación. Os detidos, xunto coas actuacións realizadas, foron postos a disposición do Xulgado de Instrución nº 2 de Betanzos.