AA Policía Local de Cambre denunciou a un mozo que paseaba pola contorna do Paraugas e a Casa das Palmeiras cun machete de 45 centímetros de folla.

Segundo informou o Concello, os feitos sucederon o pasado xoves cando dúas patrullas acudiron ata o lugar tras recibir a chamada de varios particulares que alertaban da presenza deste individuo e que, ademais, estaba acompañado por outros dous.

Ao darse conta da presenza policial, o portador do machete fuxiu da zona e acto seguido os outros dous tamén, pero en dirección contraria, previamente fixeron simulacro de acceder a un vehículo.

Os axentes tiveron tempo para recoñecelos e localizaron a dous deles pouco tempo despois. Así, como parte desa mesma intervención, a Policía rexistrou o coche ao que os mozos tentaran entrar.

Desta forma, incautáronse dunha “pequena cantidade” dunha sustancia estupefaciente que pertencía a un cuarto mozo. Pola súa banda, a persoa que portaba o machete foi denunciada por unha infracción grave contra a seguridade cidadá, por desobediencia, falta de respecto e alteración da orde pública.

Así mesmo, a Policía fixo un acta de denuncia contra o cuarto mozo implicado na intervención por tenencia de drogas tóxicas ou sustancias psicotrópicas.