O Diario Oficial de Galicia (DOG) publicou este luns a declaración de situación de alerta por escaseza de auga no sistema de abastecemento do río Mero, Arteixo e ría da Coruña, activado pola Xunta a pasada semana. Segundo informou o Executivo autonómico, esta medida, de carácter preventivo, tomouse tendo en conta a evolución das reservas do encoro de Cecebre, cuns datos que reflicten “unha anomalía” con respecto aos seus valores medios.

Con todo, aínda que se apuntou que a situación é preocupante, ante a incerteza na evolución do volume do embalsado en Cecebre para as próximas semanas e na capacidade da Coruña e a contorna para diminuír as súas demandas, non se considerou alarmante, a curto prazo, desde o punto de vista do abastecemento que se serve dese sistema.

En concreto, no DOG recóllese que se activa a alerta en base ao plan especial de seca da demarcación, que dispón que a escaseza prodúcese “ante unha situación de redución temporal da auga dispoñible que pode pór en risco a atención das demandas asociadas aos diferentes usos socioeconómicos”.

OS ALCALDES CORUÑESES TOMAN CONCIENCIA

Ante esta situación, concellos da área coruñesa apelan á concienciación. Se tras facerse pública a decisión da Administración autonómica a alcaldesa herculina, Inés Rey, apelaba a un consumo responsable. Na mesma liña o explicaron desde Arteixo, onde indicaron que se reduciron as regas en espazos públicos e os baldeos relacionados coa limpeza. “Tamén se fan campañas de concienciación para que non se desperdicie auga”, engadiron. Na mesma liña, desde Cambre aludiuse ao posicionamento difundido en agosto onde o alcalde, Óscar García Patiño, reclamou o transvasamento de auga desde Meirama ao encoro de Cecebre.