A portavoz municipal do PSOE en Arteixo e candidata nas eleccións locais do pasado maio, Patricia Boedo, confirmou que renuncia á súa acta de concelleira “por motivos persoais” e que deixará o Concello, aínda que seguirá como vicesecretaria xeral da agrupación socialista local.

Así o confirmou o partido a través dun comunicado, e así o trasladou tamén a propia Patricia Boedo nunha carta remitida aos seus compañeiros de partido. Nesa misiva, explicou que a súa renuncia é “unha decisión moi meditada” e que lle custou adoptar, pero matiza que é “a única decisión posible” debido a motivos persoais.

Boedo expón tamén que se trata de “un paso atrás dos que se dan para recuperarse e coller impulso” e que seguirá “comprometida co proxecto socialista e con Arteixo”, participando na vida orgánica do partido, desde a Executiva local.

Boedo agradeceu tamén o apoio dos seus compañeiros e compañeiras do grupo municipal e da Comisión Executiva local, así como da militancia, “pola forza” que sempre achegaron ao proxecto do PSOE de Arteixo.

Patricia Boedo é concelleira en Arteixo desde as eleccións de 2019, cando formou parte da lista encabezada por Martín Seco, e foi portavoz do grupo municipal desde maio de 2022. En 2023 foi designada candidata á Alcaldía. Ademais de vicesecretaria da Executiva local, forma parte de comité provincial do PSOE da Coruña e do comité nacional do PSdeG.