Dende hai máis de 5 meses atópase pechado ao público o Xardín de San Carlos. A praga dun fungo que provoca grafiose nos olmos provocou o peche do espazo (cuia historia coñecimos da man de Fernando Campos) xa durante 10 meses ata novembro de 2022 debido ás obras nas que o goberno municipal investiu 250.000 euros. Nesa data reabriuse, con tres olmos talados pola grafiose (máis da metade dos olmos están afectados), pero só apenas 6 meses despois, en maio de 2023, volveu pechar e aínda non foi reaberto.
Esta mañá, os membros do PP local presentaron unha batería de preguntas por escrito ao Concello instando ao goberno municipal a que adopte as decisións necesarias para reabrir o Xardín. O grupo da oposición denuncia que “a parálise municipal tamén afecta á hora de actuar contra a praga que invade o olmos no xardín, descontrolados pola incapacidade de tomar as decisións axeitadas”. O grupo pregunta cal é “o plan de conservación que están a executar para garantir a supervivencia destes olmos históricos, e por que non se procedeu á tala a pesar dos informes que o aconsellaban”.
