As eleccións a reitor ou reitora na Universidade da Coruña (UDC) serán o 4 de decembro, segundo informa o reitorado tras a sesión do Consello de Goberno. A convocatoria publicarase este venres, día 27.

En caso de ser necesaria unha segunda volta, o proceso electoral celebraríase o día 13 do mesmo mes. O actual reitor, Julio Abalde, non concorrerá a estas eleccións tras terminar o seu segundo mandato. Os estatutos da Universidade da Coruña limitan a dúas os mandatos consecutivos.

No Consello de Goberno, abordáronse outros asuntos. Entre eles, aprobouse a participación da UDC na empresa que se constituirá para xestionar a Cidade das TIC, conxuntamente co Concello da Coruña, despois de que o pleno municipal así o acordase. A sociedade xestora da Cidade das TIC ten como obxectivo desenvolver diversas actividades económicas, industriais e de servizos como a promoción da participación da cidadanía no uso eficiente e sustentable das tecnoloxías da información e as comunicacións.