A sede de Afundación Obra Social de Abanca na Coruña acolle ata o 17 de febreiro a exposición ‘Caruncho. Xeometría mundi’, unha retrospectiva a través de máis dun centenar de obras de Luís Caruncho que aborda “por primeira vez” as múltiples facetas artísticas do creador coruñés.
Así o explicaron este martes na presentación da mostra a coordinadora adxunta da área de Cultura de Afundación, Pomba Vea; o comisario da exposición, Juan de Nieves; e a historiadora de arte Tatiana Ribic, viúva do artista.
“Por primeira vez abórdase a traxectoria de Caruncho desde unha mirada global, rompendo fronteiras entre escultura, pintura ou deseño”, indicou Vea. Para ela, o percorrido pola mostra permite ao espectador “atoparse de fronte co espírito” co que o creador concibía a súa obra, “esa xeometría elegante, harmónica, valente cargada en todos os seus elementos por unha enorme alma e emoción”.
Na mesma liña, o comisario da exposición recalcou que a figura de Caruncho é “bastante singular, humana e artisticamente” e “desde os anos 50 ata 2016 é un dos artistas mais coherentes no ámbito da abstracción xeométrica”.
“Non soamente estamos a falar dun Caruncho artista, escultor e pintor, senón deseñador, escenógrafo, arquitecto e importante xestor cultural desde os anos 70”, engadiu.
“O mérito da mostra é haber concitado esas diferentes facetas e a súa enorme capacidade para ver o mundo desde unha especie de obsesión xeométrica”, sinalou na presentación. Tatiana Ribic, pola súa banda, destacou do artista que era “moi coruñés” e “de cultura con maiúscula”.
CONTIDO
A exposición ‘Caruncho. Xeometría mundi’, de entrada gratuíta, inclúe máis dun centenar de obras que o creador concibiu durante máis de 60 anos, desde as súas formulacións iniciais, con pezas de 1949, ata os traballos de 2012.
Durante a súa exhibición, dentro do programa ‘Cultura por alimentos’, Afundación deseñou actividades didácticas adaptadas a diferentes idades para “achegar aos escolares” á mostra e que tivo unha resposta “máis que satisfactoria, con máis de 700 alumnos da Coruña e arredores xa apuntados”, precisaron desde Afundación.
