Arrincou a folga indefinida de Avogados e Procuradores adscritos ao Turno de Oficio en toda España. Convocada polo Sindicato Venia, os profesionais realizaron diferentes concentracións en Galicia, entre elas diante dos Xulgados da Coruña.

”A situación dos defensores públicos, e da avogacía en xeral, é dramática, polo que a resposta ás nosas xustas demandas non pode esperar”, denuncian. E a realidade é que a calidade do servizo do avogados de oficio é moi mellorable, unha situación que afonda nas desigualdades de clase e perxudica sempre ás persoas con menos recursos.

A chamada folga nacional dos defensores públicos denuncia o silencio administrativo que leva protagonizando o Ministerio de Xustiza dende que en setembro pediran unha mesa de traballo, máis alá de anunciar un “lamentable aumento do 5% nas escalas da quenda oficial”.

Para mellorar esta situación, piden cousas como a regulación xurídica do profesional de garda, as retribucións dignas aboadas en prazo, o aboamento dos gastos ocasionados polo profesional na prestación do servizo, actualización anual das retribucións segundo IPC; o dereito á conciliación, descanso e desconexión dixital, e redución da carga burocrática.

Piden tamén campañas de sensibilización para visibilizar e dignificar a profesión.

Con todo, aseguran que haberá servizos mínimos, e intentarán que a folga non afecte tá cidadanía tanto como a realizadas polo persoal da Administración de Xustiza deste ano, e que se prevé que se reinicien en canto se constitúa un novo Goberno da Nación.