O Concello da Coruña aprobou, en Xunta de Goberno, a tramitación anticipada dunha nova convocatoria do programa ‘Talón Restaurante‘, cuxo obxectivo é a prevención da dependencia e a promoción da autonomía das persoas maiores. Segundo informa o Consistorio, esta iniciativa facilita a “interrelación” dos usuarios coa súa contorna social máis próxima, “proporcionándolles, ademais, unha alimentación equilibrada“. Contribúe, tamén, ao “mantemento e fomento” do emprego na hostalaría.

O programa, engade, conta cun orzamento de 600.000 euros, partida coa que se sufragará “parcialmente” o custo do menú que os establecementos poderán ofertar “a un prezo máximo de nove euros”. Estará en vigor entre os meses de xaneiro e decembro de 2024. Noutra orde de cousas, o goberno local aprobou este mércores a licenza para a construción dun edificio de 30 vivendas no barrio da Sagrada Familia.