Esta mañá tivo lugar unha importante reunión entre representantes das catro deputacións provinciais, a Xunta e o Comité de Folga dos Bombeiros. A parte pública trasladóuselles unha proposta aos sindicatos coa intención de chegar a un acordo e que se desconvoque a folga dos últimos meses. Unha proposta que inclúe un incremento do salario de arredor do 10%, unha redución da xornada a 1.642 horas anuais (co establecemento dun complemento horario de 158 horas para acadar as 1800 horas, que permitiría aprobar o incremento de soldo ata os 2.318€), aumento de efectivos nos 24 parques comarcais (1 por parque) e 2 xornadas a maiores de asuntos propios.

A realidade é que os representantes sindicais saíron “desencantados” e valoran de “insultante” a proposta da administración. Primeiro lamentaron que non estiveran presentes ningún presidente da Deputación, e malia valorar o “clima cordial” da reunión, o Comité avisa que “a proposta se atopa anos luz do que demandamos”.

Se ben acordaron valorala, trasladala ao colectivo e responder na vindeira reunión (que se celebrará ente 18 e o 22 de decembro), nun comunicado xa sinalan o que “a oferta é insultante e será rebatida”.

Máis novas do conflito

Bombeiros comarcais denuncian o peche de 7 parques este xoves e repiten que o servizo no rural está “en risco”

Máis de 300 Bombeiros maniféstanse na Coruña ante unha enorme despregadura policial