Un mozo morreu apuñalado na Coruña durante unha pelexa, segundo informaron a Europa Press fontes policiais en relación a un suceso que se produciu de madrugada.

Desde o servizo de emerxencias 112 precisaron que un particular lles chamou sobre as 06,35 horas informado de que había un home apuñalado. Os feitos producíronse no inicio da rúa Sinfónica de Galicia, en confluencia con Juan Flórez, explicaron as fontes consultadas.

Ao lugar desprazáronse servizos de Urxencias Sanitarias 061 e efectivos da Policía Local e da Nacional, que agora investiga os feitos e traballa na identificación do autor e a súa detención.

Fontes próximas ao caso consultadas por Europa Press explicaron que se trata dun mozo español de 22 anos, de orixe peruana, que recibiu dúas puñaladas, unha no abdome e outra no corazón, que lle provocou a morte, durante unha pelexa. Respecto ao caso, a subdelegada do Goberno na Coruña, María Rivas, lamentou o sucedido e trasladou a solidariedade á familia do novo, falecido, segundo ratificou, no transcurso dunha pelexa na vía pública e tras unha agresión con arma branca.

“Non se coñece polo momento autor nin motivo da agresión”, precisou para engadir que a Policía está a traballar “con todos os medios á súa disposición tomando testemuños e imaxes para esclarecer o sucedido o máis pronto posible”.