• Durante o acto de presentación, o portavoz de Sumar Galicia, Paulo Carlos López, anunciou un preacordo con Podemos (a pesar de ter anunciado esta mañá unha das súas candidatas nas primarias) e Esquerda Unida para concorrer xuntas ás eleccións galegas baixo o denominación “Sumar Galicia” e con Lois como candidata á presidencia.
• As bases de Podemos terán que ratificar ese apoio a unha candidatura común.

— — –

“Quero gobernar este país”. Así se presentaba a deputada de Sumar Galicia pola Coruña e voceira do Grupo Plurinacional Sumar no Congreso, que asume o reto de ser a candidata de Sumar Galicia para as vindeiras eleccións á Xunta de Galicia do 18 de febreiro de 2024.

Lois foi presentada oficialmente como candidata nun acto no que a agora candidata estivo arroupada pola líder de Sumar, Yolanda Díaz. Lois reiterou ante as persoas asistentes que Sumar será a chave para o cambio de goberno na Xunta de Galicia.

Na súa intervención, Lois fixo referencia ás políticas útiles como marca da casa Sumar e avanzou que xa é hora de que esas políticas cheguen ao goberno galego. “Acabouse o dedicar máis tempo a criticar ao goberno progresista que a facer políticas útiles para as galegas e os galegos”, afirmou a candidata.

A líder de Sumar e Vicepresidenta Segunda do Goberno do Estado, Yolanda Díaz, afirmou que “Marta é a garantía para mobilizar o voto progresista, para alcanzar un goberno de coalición que faga políticas útiles e se dedique ao que importa”. Segundo Díaz, Lois dá un paso adiante “para abrir un tempo novo en Galicia”.

Marta Lois González (Vigo, 1969) é politóloga, Doutora en Ciencia Política e da Administración e profesora na USC. Membro da comisión promotora de Sumar Galicia, foi concelleira de Igualdade, Desenvolvemento e Turismo no Concello de Santiago entre 2015 e 2019 no goberno de Compostela Aberta. Deputada de Sumar Galicia pola Coruña, Lois preside Sumar desde a súa fundación e ocupa a portavocía do Grupo Plurinacional Sumar no Congreso dos Deputados.
Foi visiting fellow nas Universidades de Essex, Georgetown e Chicago. Participou como investigadora principal proxectos de investigación financiados polo Plan Nacional de I+D e o Instituto da Muller e na actualidade centra as súas liñas de investigación en estudos de xénero, teoría política contemporánea, identidades e políticas públicas de igualdade. Conta con varias publicacións sobre estes temas. Impartiu docencia en diferentes materias como administración pública, teoría política, política comparada e partidos políticos.