Os detidos polo apuñalamento mortal de Yoel Quispe na Coruña na madrugada do día de Noiteboa elévanse a dúas, segundo informou a Delegación do Goberno en Galicia, que precisou que non se descartan máis arrestos.

Foi tras unha primeira detención esta madrugada, a dun mozo coruñés de 21 anos, como resultado dunha investigación que segue en marcha e na que se está traballando na identificación “doutras persoas implicadas”.

Así o ratificou tamén, en declaracións aos medios de comunicación, a subdelegada do Goberno na Coruña, María Rivas, que incidiu en que se traballa na identificación “de todas aquelas persoas que poidan ter algunha relación co caso”. Ademais, trasladou o seu recoñecemento ao labor da Policía Nacional e precisou que dos arrestos se informou á familia do mozo falecido, Yoel Quispe, de 22 anos, español, de orixe peruana.

Da investigación, fíxose cargo o equipo a Unidade de Delincuencia Organizada e Violenta (UDEV) do Corpo Nacional de Policía. Trátase do mesmo equipo que se encargou do caso de Samuel Luiz, falecido tras unha brutal malleira, en xullo de 2021, no paseo marítimo coruñés.

Para reclamar xustiza e en recordo ao seu achegado e coñecido, houbo o día de Nadal unha concentración no lugar onde se produciu o apuñalamento, no inicio da rúa Sinfónica de Galicia, en confluencia con Juan Flórez. Xa no enterro, celebrado este mércores, numerosas persoas que acudiron ao cemiterio de Feáns asistiron con silencio, caras de tristeza e visibles mostras de dor a despedir a Yoel, un mozo español de orixe peruana.