A Asociación Galega de Consumidores e Usuarios (ACOUGA), presentará de xeito inmediato unha demanda colectiva contra as 12 principais entidades financeiras do Estado na que instará a nulidade das cláusulas de comisión de apertura dos préstamos hipotecarios e a devolución aos consumidores das cantidades aboadas indebidamente no seu día.

A este respecto, ACOUGA recorda que no momento de asinar unha hipoteca, a entidade prestamista acostuma introducir unha cláusula na escritura de préstamo pola que o consumidor vese obrigado a pagar unha porcentaxe do importe prestado en concepto de comisión de apertura.

Esta porcentaxe varía entre o 0,50% e o 1% do capital prestado, o que supón unha media de entre 750 e 1.200 euros para cada consumidor. O secretario xeral de ACOUGA, Xoán Antón Pérez-Lema, entende que “a comisión de apertura non obedece a gasto ou servizo ningún que o consumidor teña que retribuírlle ao banco pola xestión da hipoteca”. A nova demanda presentarase tras o auto do Xulgado do Mercantil nº 1 da Coruña, notificado onte, que inadmite a trámite a demanda colectiva interposta por ACOUGA pola vía prevista inicialmente, na que a asociación consideraba aos consumidores afectados como un colectivo de difícil determinación.

Esta resolución, contra a que ACOUGA non presentará recurso para evitar maiores dilacións temporais, deixa aberta a porta para que a asociación poida iniciar sen máis demora un novo procedemento colectivo de nulidade, esta vez considerando o colectivo dos consumidores afectados como determinado ou de doada determinación. Neste caso, a demanda deberá ser precedida dunhas dilixencias preliminais que consistirán en requirirlles a todos os bancos demandados que identifiquen aos consumidores afectados e lles comuniquen a existencia da reclamación xudicial.

Este sistema xa foi empregado con éxito na colectiva de cláusulas de chan interposta por ACOUGA contra ABANCA, e que finalizou a medio de sentenza firme 156/2018, de 14 de novembro daquel ano, que estimou a demanda, e que foi ditada por este mesmo Xulgado do Mercantil nº 1 da Coruña.

En relación coas comisións de apertura, queda por coñecer a resolución do Tribunal de Xustiza da Unión Europea (TXUE) sobre a cuestión prexudicial elevada a ese órgano pola titular dun Xulgado de Primeira Instancia de San Sebastián, para que aclare se o Tribunal Supremo fixo unha interpretación restritiva para os consumidores da última sentenza europea sobre este asunto, ditada polo TXUE o 16 de marzo do ano pasado.

Nese fallo, o alto tribunal europeo deixou claro que as comisións de apertura dos préstamos hipotecarios non forman parte do obxecto principal do contrato e, por tanto, son accesorias e están suxeitas ao control de abusividade.

Porén, o 29 de maio a Sala do Civil do Tribunal Supremo ditou unha sentenza na que, contradicindo o fallo do TXUE, sostén que non existe unha solución única sobre a validez ou non das cláusulas de comisións de apertura dos préstamos hipotecarios, e que había que analizalas caso por caso conforme á proba practicada en cada un deles.