A apertura do prazo de inscrición para os concursos de comparsas, carrozas e choqueiros serve de pistoletazo de saída para o Entroido da Coruña 2024.
As bases para participar nos certames de comparsas, carrozas e choqueiros xa están
dispoñibles na páxina web municipal para as persoas interesadas.

Uns certames que repartirán máis de 30 premios en total, cun importe máximo de 20.000 euros.

O prazo de presentación de solicitudes de participación, no caso dos concursos de comparsas e carrozas, é de dez días naturais, que se contarán a partir deste sábado 13 de xaneiro. Para o de comparsas teñen que ser máis de 10 persoas e terán que enviar un correo a entroido.imce@coruna.es, ou presentarse nas oficinas do IMCE (Avenida da Mariña, 18).

O concurso resolverase nun festival que se realizará a primeira fin de semana de febreiro e será anunciado nas vindeiras semanas. O venres 9 (21.00 horas), a comparsa gañadora terá que interpretar dúas cancións do concurso no acto de entronización do Deus Momo que terá lugar no Obelisco.

No caso do concurso de carrozas, que participarán o sábado 10 de febreiro a partir das 17.30 horas. no desfile que percorrerá o Cantón Pequeno, ata a praza de María Pita, terá un mínimo de cinco premios.

No caso do concurso infantil de disfraces de Entroido, poderanse presentar todas as nenas e nenos que se inscriban o mesmo día da celebración (martes 13 de febreiro, desde as 17.00 horas, no Campo da Leña).

O concurso de choqueiros da rúa da Torre
Por último, tamén se publicaron as bases para participar no tradicional concurso de choqueiras e choqueiros, que se abrirá o mesmo día da celebración (martes 13 de febreiro, de 19.00 a 20.00 horas), no acceso principal á Escola Municipal de Música (Rúa da Torre, 67).