O Teatro Rosalía de Castro da Coruña acollerá o 13 de marzo unha gala solidaria con Palestina, baixo o título ‘Cultura contra a barbarie’. O concelleiro de Fomento e Promoción da Cidade, Gonzalo Castro, presentou o programa no que figuran artistas como Fillas de Cassandra, Xosé Antonio Touriñán ou Xurxo Fernandez.

A presentación tivo lugar no Palacio Municipal de María Pita, con presenza tamén de Iván Prado, de Pallasos en Rebeldía, promotor do evento xunto a Culturactiva.

No acto, o edil subliñou o compromiso do goberno local “coa paz e a xustiza no mundo. “E desexa e demanda o fin do conflito e o final da barbarie contra a poboación civil en Palestina”, apostilou.

Por outra banda, o Concello da Coruña colabora coa organización Fitas do Vento para facilitar a doazón de útiles de primeira utilidade, procedentes da Oficina de Obxectos Perdidos da Policía Local, e que serán destinados a proxectos educativos e de formación en escolas de Mozambique.