Policías nacionais e gardas civís, máis dun centenar, concentráronse ante a Delegación do Goberno en Galicia para demandar o recoñecemento como “profesión de risco” e unha “xubilación digna”. Tamén gardaron un minuto de silencio en recordo dos dous axentes da Benemérita mortos tras ser arroiados por unha narcolancha.
Foi cunha pancarta co lema ‘Mesmo traballo, mesma xubilación’, na que, en declaracións aos medios, demandaron a mesma xubilación que os compañeiros das policías autonómicas ou Local. “Seguimos sen ser considerados profesión de risco”, sinalou Pedro Mariscal, secretario de Organización de AUGC Coruña e de comunicacion a nivel federal galego.
Respecto diso, aludiu ao “asasinato” dos seus dous compañeiros en Cádiz, ao ser arroiados por unha narcolancha. O mesmo dixo sobre os que morren na estrada, entre outros exemplos. “Son as mesmas labores e non estamos considerados profesión de risco”, asegurou sobre gardas civís e policías nacionais. “Eles teñen un plus para xubilarse con 59 anos”, apostilou ao aludir ás policías autonómicas.
Ademais, reclamou ao Ministerio do Interior que se lles tome “en serio” e avanzou que, no marco das súas protestas, manifestaranse o 16 de marzo en Madrid para, entre outras cuestións, “ter o dereito a xubilarse aos 60 anos como unha profesion de risco” e sen a perda de poder adquisitivo que, segundo engadiu, teñen agora.
Abel Lobato, secretario provincial do Sindicato Unificado de Policía (SUP), mostrou, á súa vez, a súa confianza en que prospere unha proposición non de lei presentada no Congreso coa súa demanda de ser considerados profesión de risco “e conseguir a mesma xubilación”, reivindicación que tamén trasladaron nos seus cánticos ante o organismo central.
Mentres, preguntado a este respecto, o delegado do Goberno en Galicia, Pedro Blanco, trasladou a súa disposición a escoitar o que pide o colectivo e asegurou que este Executivo “incrementou un 30 por cento os efectivos tras anos e anos vendo diminuír o número de recursos”, ao que sumou “actualizacións en materia retributiva”. Á protesta, asistiu tamén o portavoz do PP no Congreso, Miguel Tellado.
