Será este xoves, día 22 de febreiro, cando arrinque desde a cidade da Coruña a volta ciclista O Gran Camiño. A proba, convertida xa nunha referencia internacional, e que pon a Galicia no panorama do ciclismo mundial gracias á cantidade e calidade de equipos de todo o planeta, contará cun amplo dispositivo de seguridade.
O Concello utlima os preparativos, acondicionando as zonas, principalmente do paseo marítimo, por onde discorrerán os 15km desa primeira etapa contrarreloxo pola cidade herculina.
A Coruña engalánase para a chegada da caravana ciclista do Gran Camiño
Dispositivo da Garda Civil
Ademais, o Sector de Tráfico da Garda Civil de Galicia escoltará á volta ciclista O Gran Camiño cun dispositivo de seguridade viaria que contará cuns 40 axentes.
“O Sector de Tráfico de Galicia dispuxo 40 gardas civís, de entre eles 33 motoristas, para conformar a Unidade de Mobilidade e Seguridade Viaria, que acompañarán aos ciclistas durante todo o seu percorrido. Axentes seleccionados pola súa experiencia e coñecementos neste tipo de probas, que supoñen un plus de esforzo e dedicación”, subliñou a Garda Civil.
Contarán, ademais, co apoio duns 27 compoñentes da Agrupación de Reserva e Seguridade, con base en Pontevedra, que asegurarán o percorrido ante calquera alteración da orde pública.
Dispositivo Municipal
O dispositivo de seguridade quedará establecido a partir das 11.00 horas, procedendo ao peche total do circuíto ás 13.00 horas. A reapertura ao tráfico levarase a cabo de maneira progresiva, a partir das 17.15 horas e segundo a chegada dos participantes á meta. Os cortes de tráfico motivarán desvíos e regulación das rúas paralelas para minorar os efectos para as persoas usuarias e veciños afectados polo evento.
Na zona de Monte Alto e Riazor, ante o corte total do Paseo marítimo, recomendarase empregar como itinerarios de entrada e saída o túnel Mariña-Parrote e a rúa San Andrés. Na zona do estadio de Riazor permanecerá pechada a rúa Manuel Murguía, establecéndose como alternativas a avenida da Habana e Gregorio Hernández para o acceso á Terceira Rolda.
No barrio dos Rosales, por onde atravesará a proba, establecerase un peche da rúa Manuel Azaña, no tramo comprendido entre a rolda de Outeiro e Emilio González López; habilitándose acceso aos Rosales desde a estrada dos Fortes cara a rúa Simón Bolivar, e establecéndose unhas zonas de paso que en función do transcurso da proba e o paso dos corredores permitan acceder ás vías interiores. Do mesmo xeito aplicaranse medidas similares para permitir o acceso e saída na zona de Labañou e vivendas do grupo María Pita.
Na zona do Portiño, será necesario restrinxir a circulación de vehículos mentres dure a proba, que se restablecerá en canto o paso dos corredores e participantes así o permita.
Hai información ampliada por zonas na páxina web municipal da Concellaría de Deportes.
