Galicia Fórum Gastronómico 2024 celebrarase os días 7, 8 e 9 de abril na Coruña, en ExpoCoruña, coa “despensa atlántica” e o viño como protagonistas e a participación dun total de “25 estrelas michelín”. “O Fórum é un escaparate, un punto de inspiración, onde aprender, ver e ofrecer”, dixo o director de Trade Mercadotecnia e RRPP en Hijos de Rivera, Manel Piñón, durante a presentación da novena edición deste evento que inclúe, como novidade, un “monográfico” dedicado ao queixo como “referencia nacional”.
No acto participaron tamén a directora de Galicia Fórum Gastronómico, Ana Trevisani, e o director de programa Galicia Fórum Gastronómico, Pep Palau. Para Trevisani os obxectivos deste encontro son “reforzar o destino Coruña”, así como “o territorio Galicia” como “potencia nacional en talento de cociñeiros e en produto”. Ademais, pretende “pór en valor e amplificar o valor da despensa e o produto galego”, exportar o talento dos cociñeiros, achegar formación ao sector e facer networking cos expositores.
Pola súa banda, Palau anunciou que este ano o tema central será a “despensa atlántica” e “un dos produtos estrela o porco”. Tamén, terán especial protagonismo “os produtos do mar” e a “biodiversidade”. “Galicia é un verxel, ten de todo”, apostilou. O Fórum Gastronómico incluirá “espazos tradicionais e para a formación e a reflexión”, expuxeron os promotores na presentación deste evento. Entre outras propostas, haberá unha sección dedicada ao viño, ‘Wine Circus’, celebrarase a segunda edición da Batalla de Catadoras e as ‘Wine talks’, así como ‘Vinomios’ e actividades de coctelería, que se desenvolverán baixo a marca ‘Cocktail Bar Fórum’.
