O Xulgado do Social número 5 da Coruña condenou ao Instituto Nacional da Seguridade Social (INSS) a indemnizar por danos e prexuízos a un home que tivo que reclamar xudicialmente o complemento de maternidade para a súa pensión. No fallo recoñécese unha indemnización por importe de 1.800 euros polos danos morais e outros adicionais derivados da vulneración do seu dereito fundamental á igualdade e á non discriminación, informa o despacho que levou o caso, Caruncho & Tomei Avogados.
Ao demandante recoñecéuselle o complemento por maternidade tras reclamar xudicialmente ao Instituto Nacional da Seguridade Social. O Xulgado do Social número 1 da Coruña en primeiro lugar e o Tribunal Superior de Xustiza de Galicia, logo, déronlle a razón. En canto á demanda á que fai referencia o despacho, foi presentada reclamando unicamente a indemnización por danos morais, “despois de que unha sentenza firme recoñecese o dereito ao complemento do pensionista”. “O novo desta sentenza é que se recoñece o dereito a percibir a indemnización despois de ter o xuízo e sentencia reclamando o complemento por maternidade, o que abre a porta a que miles de xubilados que foron recoñecidos con este complemento reclamen a indemnización“.
