O ciclo de Poetas Dei(n)versos, que organiza e presenta Yolanda Castaño, volve este luns, día 25, ás 20,00 horas ao auditorio Ágora da Coruña e xuntará a un poeta galego cun hondureño: Abraham Pérez e Rolando Kattan.

As entradas aos recitais son gratuítas e ata completar aforamento. Esta cita, en concreto, é a última do trimestre de poesía organizado polo Concello da Coruña, que empezará un novo ciclo o vindeiro luns 22 de abril.

Abraham Pérez (Lugo, 1990), graduado e con mestría en Filosofía pola Universidade de Santiago de Compostela, é autor da novela ‘O paso en falso’, coa que foi finalista do XXXIV Premio Torrente Ballester de narrativa, así como do poemario ‘O corpo transparente das horas’. O lucense foi seleccionado para gozar da Residencia Artística Mariñán de literatura e pensamento en 2022, e, un ano despois, da Residencia de creación literaria Illa de San Simón. Parte da súa obra foi traducida ao portugués e ao español. Ademais, en breve aparecerá en francés.

Rolando Kattan (Tegucigalpa, Honduras) é editor e xestor cultural, así como un dos autores da literatura hondureña máis relevantes contemporáneos con títulos como ‘Los cisnes negros’ –Premio Casa América da Poesía Americana–, ‘Viaje imaginaria a Kiribati’ ou ‘Donde volver deseo’, presentes en numerosas antoloxías e en diversidade de linguas. Kattan, membro correspondente da Real Academia Española da Lingua e membro numerario da Academia Hondureña da Lingua, recibiu o Premio Nacional de Literatura Ramón Rosa e o Premio Bucovina de Poesía.