O persoal da xerencia e das oficinas administrativas do complexo hospitalario universitario da Coruña trasladarase a finais de verán ás instalacións habilitadas en ExpoCoruña polas obras de ampliación do citado complexo, dentro do proxecto do ‘Novo Chuac’. Así o expuxo o conselleiro de Sanidade en funcións, Julio García Comesaña, nunha visita ás obras de adaptación para este fin do recinto feiral, acompañado polo director xerente de ExpoCoruña, Andrés Fernández, e o xerente da área sanitaria, Luís Verde, entre outros.
Comesaña precisou que suporá o traslado dunhas 200 persoas pola demolición do Hotel de Pacientes, no que desenvolven ata agora o seu traballo, e que logo volverán á súa localización na contorna do hospital. As obras de adaptación de ExpoCoruña, segundo apuntou, contan cun orzamento de 1,6 millóns de euros. Para o conselleiro, o acondicionamento de “estas instalacións excelentes que estaban baleiras e sen uso é un paso importante no avance do ‘Novo Chuac'”.
EXPROPIACIÓNS
Mentres, cuestionado pola situación das expropiacións necesarias para construír o ‘Novo Chuac’, asegurou que están “moi avanzadas e algunhas acabadas”, nun proceso que foi “moi consensuado” e con “alternativas ben resoltas”. Non entanto, lamentou “as dificultades que xera a usuarios e veciños”. “O ben común é o complexo e xustifica estes inconvenientes que tratamos de minimizar o máximo posible”, apostilou. Na mesma liña, o xerente da área sanitaria da Coruña e Cee destacou que a adaptación destes espazos en ExpoCoruña son “un paso máis dese ‘Novo Chuac'”.
