O concelleiro de Educación da Coruña, Juan Ignacio Borrego, entregou este sábado na Domus os premios da terceira edición do programa Imaxina Coruña, unha iniciativa impulsada polo Goberno de Inés Rey e destinada a difundir a cultura científica e tecnolóxica entre o alumnado de Educación Secundaria da cidade.
Os gañadores desta edición do certame foron o CPR Internacional de Eirís na categoría de sustentabilidade, co proxecto ‘Ecomoda’; o IES Rafael Puga Ramón na categoría de Innovación, co proxecto ‘La ciudad de cristal desde la perspectiva STEAM y de sostenibilidad’, e o CPR Escravas do Sacro Corazón na categoría de compromiso social, co proxecto ‘Concienciarte’.
Ademais, o IES Agra do Orzán recibiu o premio ao mellor vídeo-relato do seu proxecto, concedido por votación popular. O concelleiro destacou a calidade e a orixinalidade dos traballos presentados, que orbitaron ao redor da temática das artes, ciencia e tecnoloxía. Na actividade participaron 71 estudantes e 16 profesores de dez centros educativos, que presentaron un total de 20 proxectos. Os tres equipos premiados viaxarán a Bilbao para visitar a feira científica Zientzia Azoka, e os centros aos que pertencen recibirán un cheque regalo por importe de 500 euros para adquirir material científico e tecnolóxico.
