Prepárase a cidade para celebrar en Catro Camiño o ascenso do Real Club Deportivo a 2ª División. Despois da celebración dirixida na contorna de Riazor, a afección branquiazul poderá acodir, en diferido, ao lugar onde se deberían celebrar, de forma institiva, os nosos triunfos.
Así, quitándolle maxia, o Concello da Coruña habilitará este sábado un dispositivo especial de seguridade na fonte de Catro Camiños. A celebración darase despois do partido, ás 19.00h ante un Real Unión que se xoga o descenso, facendo o equipo o traxecto a partir das 21:30h en autobús descapotable dende o estadio ata a fonte, ata a zona fronte a San Pedro de Mezonzo, indica o club, zona onde se cortará o tráfico.
Pero antes, a festa desenvolverase ao longo de hoxe, coa Banda del Camión preparada co himno, facendo parada ás 12:00h nos Rosalies, ás 13:50 na zona do Campo da Leña, e ás 17:40h, diante do Playa.
Domingo en María Pita
Será tanto en sentido de entrada como de saída. Por outra banda, a tradicional recepción ao club no Palacio Municipal de María Pita terá lugar este domingo, día 26, desde as 19.00 horas.
CONVENIO
Por outra banda, o goberno municipal aprobou este venres, na Xunta de Goberno local, o convenio que regula a cesión do estadio municipal de Riazor ao club.
O convenio mantén os mesmos termos do que actualmente rexe esa mesma cesión, un documento asinado no ano 2000 e con vixencia ata agosto do ano que vén, precisa o consistorio.
A cesión do estadio será por outros 25 anos e será, novamente, gratuíta. O convenio aprobado hoxe xa está asinado polas dúas partes.
O convenio estipula tamén, como no actualmente vixente, que en Riazor seguirá disputándose o trofeo Teresa Herrera e mantén tamén a petición do club de que o estadio teña a denominación Abanca-Riazor nas competicións deportivas.
