A Xunta de Galicia licitou por máis de 680.000 euros as obras de ampliación das redes de abastecemento e saneamento do núcleo de O Canedo, no concello coruñés de Ordes. Tal como informou o Goberno galego, as actuacións, cun prazo de execución de seis meses, teñen como finalidade substituír as traídas veciñais e os pozos particulares existentes na actualidade por unha rede común que garanta un apropiado control sanitario e que facilite os labores de mantemento e limpeza das instalacións. “Os traballos permitirán dar un servizo adecuado aos veciños desta zona cun horizonte temporal que vai ata o ano 2045“, reivindicou o Executivo autonómico.

No caso da rede de abastecemento, inclúen a instalación de 2.500 metros de tubos de 75 milímetros de diámetro para a rede principal e de 315 metros de tubos de 63 milímetros para os ramais secundarios, entre outras. En canto ao saneamento, supoñen a colocación de 1.470 metros de tubos de 315 milímetros e 110 metros de 250 milímetros, así como distintos pozos de rexistro prefabricados. Como as actuacións desenvolveranse na contorna da N-550, chegando a cruzala ata en catro ocasiones, o contrato que se licita inclúe a reposición dos pavimentos.