A Xunta reactiva desde o sábado as frecuencias de autobús entre A Coruña e Sada a primeira e última hora do día nos fins de semana e festivos.

A Consellería de Presidencia asegura que, tras a reestruturación dos servizos de transporte público no corredor A Coruña-Oleiros-Sada que se puxo en marcha o 22 de xuño, produciuse “un desaxuste puntual”.

“Que se resolve xa a partir do día 29 co restablecemento das frecuencias de autobús máis cedo pola mañá e máis tarde na tarde”, engade. Estes servizos conectan Sada coa Coruña, pasando por Lorbé, Dexo e Mera, en Oleiros, tanto á ida como á volta.

Os sábados sae de Sada un servizo ás 07.30 horas e dúas expedicións de volta desde Entrejardines, ás 08.30 horas e ás 22.00 horas.

Os domingos e festivos funcionan catro servizos que amplían o horario dos autobuses cara á Coruña, con saídas de Sada ás 08.30 horas e ás 21.00 horas, mentres de Entrejardines saen ás 09.30 horas e ás 22.00 horas.

Respecto diso, o BNG demandou, tanto no Parlamento Galego como en Oleiros e en Sada, unha corrección dos problemas do transporte metropolitano entre estes municipios.