Mentres Monte Alto agarda con ansia a rehabilitación do Monte Vixía e a súa conversión un parque para o disfrute da veciñanza, os colectivos sociais reivindican o espazo da “A Pena da Vixía” como o verdadeiro centro místico de Monte-Alto.

Así, mantendo viva esta “neo-tradición coruñenta”, este xoves 27 de xuño, con saída, ás 20 horas, da biblioteca da Asociación Veciñal Atochas/ Monte-Alto (rúa da Torre), está convocado o “IV ascenso á Pena da Vixía”, da man de Xurxo Souto e Na procura dos “homes mariños”.

Lembra Souto que “na Pena da Vixía atopou Francisco Tettamancy a rocha cos petróglifos que actualmente se custodian no Museo do Castelo de San Antón. Alí estaba situada a garita dende a que o vixía controlaba a entrada dos barcos cara ao porto”.

Por iso, “dende este outeiro, no solpor, quizá albisquemos de novo os “homes mariños”, seres míticos que habitan no mar do Orzán, protagonistas da novela de Xurxo Souto.

Máis novas

Dicionario antroideiro coruñés (II) A chistera marabillosa do señor Canzobre